தமிழைத் தொடர்ந்து சிங்களத்திலும் தயாராகும் ‘இரு முகம்’ — இயக்குநர் கே. கிஷாந்தின் திரைப்படம் இந்த வருடம் திரையரங்குகளில்!

Eastern Fox மற்றும் Screen Entertainment இணைந்து தயாரிப்பில், ரோக்ஸ் டி சில்வா (Rox De Silva) வழங்கும் புதிய திரைப்படமான ‘இரு முகம்’ (Iru Mugam / මුහුණු දෙකක්) தமிழ் மொழியைத் தொடர்ந்து சிங்கள மொழியிலும் டப்பிங் செய்யப்பட்டு வெளியீட்டிற்குத் தயாராகி வருகிறது.

இலங்கையின் தமிழ் மற்றும் சிங்கள மொழிப் பார்வையாளர்களைச் சென்றடையும் நோக்கில் உருவாகியுள்ள இப்படம், இந்த வருடம் திரையரங்குகளில் வெளியாகவுள்ளதாக படக்குழு அறிவித்துள்ளது.

கே. கிஷாந்தின் பன்முகப் பங்களிப்பு

‘இரு முகம்’ திரைப்படத்தின் கதை, திரைக்கதை, வசனம், இயக்கம், இசை மற்றும் படத்தொகுப்பு ஆகிய பணிகளை கே. கிஷாந்த் (K. Kishanth) மேற்கொண்டுள்ளார்.

மனிதர்களின் மாறுபட்ட முகங்கள், காதல், குடும்ப உறவுகள் மற்றும் வாழ்வில் ஏற்படும் எதிர்பாராத திருப்பங்களைச் சுற்றி இப்படத்தின் கதைக்களம் நகர்கிறது.

எம். பிரதிஜன் (M. Prathijan), தனுஷ்கா ரமேஷ் (Thanushga Ramesh), பி. முரளிதரன் (P. Muralitharan), தேவா அலோசியஸ் (Deva Aloysius), துஷிமயூரான் (Thushimayuran) உள்ளிட்ட பல இலங்கைக் கலைஞர்கள் இப்படத்தில் நடித்துள்ளனர்.

தொழில்நுட்பக் குழு

இப்படத்தின் ஒளிப்பதிவு மற்றும் ஒளியமைப்பை என். நிருஷாந்த் (N. Nirushanth) மேற்கொண்டுள்ளார். பாடல் வரிகளை பி. அபிலாஷன் (P. Abilashan) எழுதியுள்ளதுடன், கூடுதல் இசை மற்றும் பாடல் கலவைப் பணிகளை ஏ.ஜே. சங்கர்ஜன் (AJ Shangarjan) மேற்கொண்டுள்ளார்.

திரைப்படத்தின் ஒலி கலவை மற்றும் SFX பணிகளை Screen Entertainment கையாண்டுள்ளது. சிங்கள டப்பிங் பணிகளில் கே. பிரசானியா மற்றும் கே. கிஷாந்த் பங்களித்துள்ளனர்.

தமிழைத் தொடர்ந்து சிங்கள மொழியிலும் பார்வையாளர்களைச் சென்றடையத் தயாராகும் ‘இரு முகம்’ திரைப்படக் குழுவினருக்கு Thirai Murasu குழுவின் வாழ்த்துக்கள்!