சமீபகாலமாக Independent தமிழ் இசை உலகில் புதிய அலை எழுந்து வருகிறது. சினிமா பாடல்களுக்கு இணையாக, சில நேரங்களில் அதை விடவும் மேலாக, சுயாதீன கலைஞர்கள் தங்களின் தனித்துவமான படைப்புகள் மூலம் எல்லைகளை தாண்டி முத்திரை பதித்து வருகிறார்கள். அந்த வரிசையில் யுக்தா புரொடக்ஷன்ஸின் "LOOSE LOOSE" — தற்கால சமூகத்தின் இரட்டை வேட முகத்திரையை அப்பட்டமாக தோலுரித்துக் காட்டும் ஒரு எனர்ஜிட்டிக் துள்ளல் பாடலாக வெளிவந்துள்ளது.
கதைக்களம் — பொதுவெளியின் போலித்தனம்...
பாடலின் தொடக்கக் காட்சியே நம் அன்றாட வாழ்வில் நாம் கடந்து வரும் ஒரு எதார்த்த நிலையை படம் பிடிக்கிறது. பேருந்து நிறுத்தத்தில் நவீன உடை அணிந்து செல்லும் இளம் பெண்ணைப் பார்த்து "இந்த மாதிரி டிரஸ் பண்ணிட்டு போனா நம்ம கலாச்சாரம் தானே அழிஞ்சு போகும்..." என புறம் பேசும் ஒரு ஜோடி, சில நிமிடங்களில் வீட்டிற்கு சென்று சினிமா நடிகை ஆடும் நடனத்தை "அந்த பொண்ணு ரொம்ப நல்லா ஆடுதுல்ல..." என்று ரசித்துப் பார்க்கிறார்கள். இந்த ஒரே ஒரு காட்சியில் இயக்குனர் G.K. சமூகத்தின் மிகப்பெரிய போலித்தனத்தை மிக எளிமையாக உடைத்தெறிகிறார்.
இசை — சர்வதேச தரம்...
இசையமைப்பாளர் G.K. கிருஸ், தற்கால இளைஞர்களின் ரசனைக்கு ஏற்றவாறு இசையை வடிவமைத்துள்ளார். தொடக்கத்தில் வரும் வசனங்களுக்கு பிறகு திடீரென ஆரம்பிக்கும் நவீன மின்னணு தாளங்கள் கேட்பவரை முதல் நொடியிலேயே ஈர்த்து விடுகின்றன. பாடல் முழுக்கப் பயன்படுத்தப்பட்டுள்ள Bass Lines மற்றும் கலகலப்பான Rhythm, பாடலுக்கு ஒரு சர்வதேச Pop தரத்தை கொடுக்கிறது. எங்கும் தொய்வில்லாமல் நகரும் Beats, Dance Clubs-ல் ஒலிக்கக்கூடிய ஒரு Party Anthem போன்ற உணர்வை தருகிறது.
தாணுவின் குரல் & நடிப்பு — மிரட்டலான ஆதிக்கம்...
இந்த முழு பாடலையும் தன் தோள்களில் தாங்கி நிற்கிறார் பாடகி தாணு. தன்னை விமர்சிப்பவர்களை நோக்கி "நீங்க நினைக்கிற மாதிரி நான் இல்ல ப்ரோ..." என்று பாடும் இடங்களில் மிடுக்கான அலட்சியமும், அதே சமயம் தில்லான ரவுடித்தனமும் கலந்திருக்கிறது. கேமராவை மிக தைரியமாக எதிர்கொண்டுள்ள அவரது Screen Presence குறிப்பிடத்தக்கது. "லூஸ் லூஸ்..." என்று வரும் பல்லவி வரிகளின் போது அவர் காட்டும் Expressions இளைஞர்கள் மத்தியில் எளிதில் Reach ஆகும் ரகம்.
வரிகள் — நேரடி சாட்டையடி...
தாணுகிருஷின் வரிகள் எவ்வித பந்தாவும் இன்றி அன்றாட பேச்சுவழக்கு தமிழில் எழுதப்பட்டுள்ளன. சமூக வலைத்தளங்களில் அடுத்தவர்களைப் பற்றி தேவையில்லாமல் பேசிக்கொண்டிருக்கும் Trollers-களுக்கும் நெட்டிசன்களுக்கும் இந்த வரிகள் நேரடி சாட்டையடி. "ஆக மொத்தம் லூசு குடும்பமப்பா" என்ற ஒற்றை வரியில் நச்சென்று சொல்லியிருப்பது ரசிக்க வைக்கிறது.
இயக்கம் & நடனம்...
இயக்குனர் G.K. காட்சிகளை மிகத் துடிப்பாகவும் வண்ணமயமாகவும் நகர்த்தியுள்ளார். Lighting மற்றும் Frames ஒரு சுயாதீன ஆல்பத்திற்குரிய தரத்துடன் நேர்த்தியாக கையாளப்பட்டுள்ளன. துடிப்பான வண்ணமயமான ஆடைகளுடன் Background Dancers-களின் அசைவுகளும், தாணுவின் நடனமும் பாடலின் வேகத்திற்கு ஈடு கொடுத்து ஒட்டுமொத்த Music Video-விற்கும் புதிய Energy-யை தருகிறது.
சில சிறு குறைகள்...
பாடல் மிக நேர்த்தியாக இருந்தாலும், இடையில் வரும் சில Rap பாணி வரிகளின் உச்சரிப்பு இன்னும் சற்று தெளிவாக இருந்திருக்கலாம். காட்சி அமைப்புகளில் இன்னும் கொஞ்சம் புதுமையான Angles கையாண்டிருந்தால் Visually இன்னும் பிரம்மாண்டமாக இருந்திருக்கும். எனினும், ஒரு சுயாதீனப் படைப்பாக இக்குழுவினரின் உழைப்பு அந்த சிறு குறைகளை மறைத்து விடுகிறது.
"LOOSE LOOSE" — பிறரின் தேவையற்ற விமர்சனங்களையும், சமூகத்தின் போலித்தனமான பார்வைகளையும் புறந்தள்ளிவிட்டு, தன் பாதையில் ஜாலியாக வாழ நினைக்கும் இன்றைய Gen-Z தலைமுறையினருக்கான ஒரு பக்கா Rebel கொண்டாட்டப் பாடல்! சுயாதீன இசைத்துறையில் தங்களின் தனித்துவமான அடையாளத்தோடு தடம் பதிக்கும் இந்த இளவட்டக் குழுவினரின் முயற்சிக்கு Thirai Murasu மனமார்ந்த வாழ்த்துகளையும் பாராட்டுகளையும் தெரிவிக்கிறது.
கருத்துக்கள் மற்றும் பகிர்வுகள்