`ராப் சிலோன்` கலைஞர்களுக்கு இடையே மோதல் நடந்தது என்ன | உண்மை நிலவரத்தை விளக்கிய திசோன் விஜயமோகன்!

இலங்கைத் தமிழ் இசையுலகில் தங்களது கடின உழைப்பால் சர்வதேச அளவில் வளர்ந்து வரும் 'ராப் சிலோன்' கூட்டணிக் கலைஞர்களான திசோன், வாகீசன் ராசையா மற்றும் ஆத்விக் ஆகியோர் கனடாவில் தொடர்ந்து இசை நிகழ்ச்சிகளை நடத்தி வருகின்றனர். இந்தச் சூழலில் திசோன் இலங்கை திரும்பியிருந்ததை தவறாகப் புரிந்துகொண்ட சிலர், கலைஞர்களுக்கு இடையே மோதல் வெடித்ததாகவும் வாகீசன் திசோனை தாக்கியதாகவும் சமூக வலைத்தளங்களில் அடிப்படை ஆதாரமற்ற வதந்திகளை பரப்பி வந்தனர். இதற்கு திசோன் விஜயமோகன் தனது அதிகாரப்பூர்வ முகநூல் பக்கத்தில் நேரடி விளக்கம் அளித்து முற்றுப்புள்ளி வைத்துள்ளார்.

"முதலில் நான் நலமாக இருக்கிறேன் என்பதை அனைவருக்கும் தெரிவித்துக்கொள்கிறேன். என்னை எனது நண்பர் தாக்கவில்லை அல்லது அடிக்கவில்லை. நான் எனது நண்பர்களுடன் விளையாடிக்கொண்டிருந்தபோது எதிர்பாராத விதமாக பந்து எனது மூக்கில் பலமாக பட்டது. அதன் காரணமாகவே மூக்கில் எலும்பு முறிவு ஏற்பட்டது. தேவையான மருத்துவ சிகிச்சையைப் பெற்று வருகிறேன். குடும்ப நிகழ்வு மற்றும் சிகிச்சைக்காகவே இலங்கை வந்துள்ளேன். நடந்த சம்பவத்தை தவறாக சித்தரிக்கும் வதந்திகளை யாரும் பகிரவோ நம்பவோ வேண்டாம் — இது விளையாட்டின்போது நடந்த துரதிர்ஷ்டவசமான ஒரு விபத்து மட்டுமே" என்று திசோன் தெளிவுபடுத்தியுள்ளார்.

குறிப்பாக வாகீசன் ராசையா தனது தனித்துவமான திறமையால் இந்தியத் தமிழ் திரைப்படங்களில் முன்னணிப் பின்னணிப் பாடகராக தடம் பதித்துள்ளார். மேலும் Sun TV-யில் ஒளிபரப்பான 'Top Cooku Dupe Cooku Season 2'-ல் முக்கிய போட்டியாளராக களமிறங்கி உலகத் தமிழ் ரசிகர்களின் மனங்களை வென்றெடுத்துள்ளார். கனடாவில் திட்டமிடப்பட்ட நிகழ்ச்சிகளை வாகீசனும் ஆத்விக்கும் தொடர்ந்து முன்னெடுத்து வரும் நிலையில் திசோன் குணமடைந்து விரைவில் மீண்டும் இசைப் பயணத்தில் இணைவார் என தெரிவிக்கப்பட்டுள்ளது.

திசோன் விஜயமோகன் விரைவில் பூரண குணமடைந்து இசைப் பணிகளை தொடர Thirai Murasu குழுவின் வாழ்த்துக்கள்!